Rritje e rasteve të disa llojeve të kancerit tek personat nën 50 vjeç në Angli

Një analizë e re ka evidentuar një shtim të rasteve të disa llojeve të kancerit tek personat nën 50 vjeç në Angli gjatë periudhës 2001–2023. Studimi, i bazuar në të dhënat zyrtare të regjistrit të kancerit, shqyrtoi 12 lloje të ndryshme të sëmundjes.

Sipas rezultateve, rritje të dukshme janë regjistruar te kanceri i gjirit, zorrës së trashë dhe rektumit, veshkave, mëlçisë, pankreasit, prostatës dhe mitrës.

Ndryshimi më i madh proporcional është vërejtur te kanceri i prostatës. Numri i rasteve te burrat nën 50 vjeç u rrit nga 158 në vitin 2001 në 640 raste në vitin 2023. Incidenca shkoi nga 1 në 3.6 raste për 100 mijë burra, megjithëse kjo sëmundje vazhdon të jetë relativisht e rrallë në këtë grupmoshë.

Edhe rastet e kancerit kolorektal te personat e rinj shënuan një rritje të konsiderueshme. Tek gratë, incidenca u rrit nga 3.8 në 8.3 raste për 100 mijë, ndërsa tek burrat nga 4 në 8.4 raste për 100 mijë.

Një tjetër rritje e rëndësishme u evidentua te kanceri i mitrës, ku incidenca u rrit nga 1.8 në 3.9 raste për 100 mijë gra. Ndërkohë, rastet e kancerit të veshkave u shtuan si te gratë, ashtu edhe te burrat.

Kanceri i gjirit vazhdon të jetë forma më e përhapur e kancerit të diagnostikuar te gratë nën 50 vjeç. Incidenca e tij u rrit nga 42 në 47.5 raste për 100 mijë gra. Rritje, ndonëse më të moderuara, u vunë re edhe për kancerin e mëlçisë dhe pankreasit.

Analiza krahasoi gjithashtu situatën në Angli me të dhënat nga Shtetet e Bashkuara dhe Holanda. Në SHBA u gjetën rritje të ndjeshme në pesë lloje kanceri, ndërsa në Holandë në katër prej tyre.

Studiuesit theksojnë se këto të dhëna tregojnë një prirje në rritje të disa formave të kancerit me shfaqje në moshë më të re. Për të kuptuar arsyet e këtyre ndryshimeve dhe faktorët që mund të ndikojnë në to, nevojiten kërkime të mëtejshme.

 

 

 

 

 

 

 

---