Studim: Një në tetë raste të kancerit lidhet me infeksionet

Pixabay - fernando zhiminaicela

Rreth 2.3 milionë raste të reja të kancerit në mbarë botën, ose afërsisht një në tetë, lidhen me infeksionet, ndërsa një pjesë e madhe e tyre mund të parandalohen. Këto janë gjetjet e një studimi të ri të Agjencisë Ndërkombëtare për Kërkimin e Kancerit (IARC), pjesë e Organizatës Botërore të Shëndetësisë.

Sipas studimit, të publikuar në The Lancet Oncology, ndër shkaktarët kryesorë janë bakteri Helicobacter pylori, papillomavirusi i njeriut (HPV), virusi i hepatitit B, virusi Epstein-Barr dhe virusi i hepatitit C.

Helicobacter pylori lidhet me rreth 760 mijë raste të kancerit, ndërsa HPV me rreth 750 mijë. Hepatiti B shkakton rreth 360 mijë raste, virusi Epstein-Barr rreth 260 mijë dhe hepatiti C rreth 160 mijë.

Studimi tregon edhe dallime të mëdha mes rajoneve. Azia Lindore përbën rreth 42 për qind të rasteve të kancerit të lidhura me infeksionet në botë, ndërsa Afrika Sub-Sahariane rreth 28.5 për qind. Më shumë se tri të katërtat e këtyre rasteve në vitin 2024 janë regjistruar në vendet me të ardhura të ulëta dhe të mesme.

Sipas studiuesve, vaksinimi kundër HPV-së dhe hepatitit B, diagnostikimi dhe trajtimi i disa infeksioneve, si dhe masat mbrojtëse mund të ndihmojnë në parandalimin e një pjese të konsiderueshme të këtyre rasteve.

Megjithatë, qasja e pabarabartë në shërbime shëndetësore, kostot dhe faktorët politikë vazhdojnë të pengojnë zbatimin e masave parandaluese në shumë vende.