Kuqezinjtë kthehen në Shqipëri

Pas shkuarjes në Evropian, kryeministri Edia Rama paralajmëroi ndërtimin e stadiumit të ri të Kombëtares, “Arenën Kombëtare” të Tiranës, për të cilën tha se kanë nisur punimet

Qindra mijëra qytetarë nga të gjitha krahinat, janë grumbulluar në qendër të Tiranës, për t’i pritur si heronj lojtarët e Kombëtares Shqiptare të futbollit, të cilët u kthyen nga Armenia me tri pikët e arta që ia siguruan plasmanin në Evropianin “Franca 2016”. Motoja e pritjes është me “Plis në Paris”.

Kombëtarja u kthye në Tiranë, ndërsa u prit solemnisht nga kryeministri Edi Rama dhe Ministrja e Sportit, Lindita Nikolla, të cilët këta lojtarë i nderuan dhe i vlerësuan si nderi i kombit. Rama paralajmëroi ndërtimin e stadiumit të ri të Kombëtares, “Arenën Kombëtare” të Tiranës, për të cilën tha se kanë nisur punimet.

Ndërkaq, Federata Shqiptare e Futbollit premtoi në rast fitoreje dhe kualifikimi në Euro 2016, një premio prej 2 milionë eurosh për futbollistët.

“Të dashur futbollistë, i shtrenjti kapiten dhe i dashur trajner. I nderuar president i FSHF-së. Më lejoni që përulësisht t’iu falënderoj me gjithë zemër dhe të shpreh mirënjohjen për arritjen tuaj historike. Ju kurorëzuat me sukses vrapimin më të vështirë dhe emocionues të karrierës dhe gjithë historisë së futbollit shqiptar”, tha rama në fillim me fjalët e tij emocionuese.

Deri dy vite më parë, sipas tij,  askush nuk guxonte ta shihte as me sy mbyllur ëndrrën për t’i ngjitur në Evropian, përveç trajnerit, që kryeministri shqiptare quan “të çmendur”, sidomos pas tonë që pas marrjes së nënshtetësisë, ka besuar në kualifikim.

“Ju fituat, barazuat e humbët, u ngjitët, u rrëzuat dhe u ringjitet, duke shkruar një faqe të lavdishme në histori”, tha më tej Rama.

Ndërsa kapiteni i Kombëtares Shqiptare, ai që quhen si shpirti “kuq e zi” Lorik Cana, i cili pas 13 vjet angazhimi me kombëtaren arriti plasmanin në Evropian, tha se “në Evropian me kokën lart, si Shqipëri e Madhe, jo si Shqipëria e vogël”.

“Si më i vjetri në Kombëtare kanë ardhur me të njëjtin qëllim dhe kur kemi mbështetjen dhe njerëz që e vlerësojnë këtë sakrificë, sigurisht për ne gëzimi është i shumëfishuar. Në emër të ekipit besoj se, secili nga lojtarët tanë, jemi jo vetëm krenar e të lumtur për veten, por edhe sepse dimë sa u kemi bërë të lumtur dhe kjo na jep kënaqësinë më të madhe”, tha Cana

Duke përmendur një thënie të Mit’hat Frashërit, Cana shprehet se shqiptarët do të fitojnë çdo luftë kur të kenë mbaruar betejat brenda vetes. “Besoj që kjo kombëtare ka arritur një gjë, që në çdo lloj beteje mes vetes, xhelozie, interesi personal e kemi lënë anash”, tha Cana.

Ndërsa përzgjedhësi i Shqipërisë, italiani Gianni de Biasi ka thënë se meritat për këtë arritje të Kombëtares shqiptare janë të lojtarëve dhe se ai vetëm i ka bashkuar ata.

“Unë nuk do të kisha mundur të bëja asgjë, unë thjeshtë i bashkova ata, i shoqërova. Ishit ju që më qëndruat kaq afër dhe unë jam munduar t’i bashkoj dhe të marrë më të mirën e tyre”, tha De Biasi.

Shqipëria arrin të kualifikohet në Kampionatin Evropian të Futbollit “Franca 2016”, për herë të parë në histori të futbollit shqiptar, duke realizuar ëndrrën e qindra futbollistëve shqiptarë që luajtën ndër vite. Me fitoren 3:0 ndaj Armenisë, Kombëtarja Shqiptare u kualifikua si e dyta në grupin I me 14 pikë, dy më shumë se Danimarka që luan në play-off.

Ndryshe, Kombëtarja e Shqipërisë, e cila siguroi kualifikimin direkt për në Evropian, duke fituar ndaj Armenisë 3-0, do të marrë një shpërblim prej plot 12 milionë eurosh nga organi drejtues i sportit në kontinent. Katër milionë më tepër sesa kanë marrë kombëtaret që ishin pjesëmarrëse në edicionin e kaluar.

 

---