Aksidentohet autobusi i kombëtares shqiptare

Autobusi që duhej të transportonte lojtarët e kombëtares shqiptare për në stërvitjen e programuar për të shtunën paradite është aksidentuar. Lojtarët detyrohen të shkojnë në stërvitje me taksi.

Trajneri De Biazi ka lënë pushim titullarët, por ka planifikuar në Kopenhage një seancë stërvitore paradite me lojtarët që nuk u aktivizuan, në një kohë që nisja për në Shqipëri do të bëhet të shtunën pasdite.

Teksa autobusi ishte nisur për të i transportuar futbollistët e kombëtares nga hoteli, gjatë rrugës pati një aksident. Në autobus ka qenë i pranishëm vetëm shoferi danez, por për fat të mirë edhe ai ka shpëtuar pa lëndime.

Pas këtij rasti, futbollistët e kombëtares u detyruan të shkojnë në stërvitje me taksi, bëjnë të ditur mediet shqiptare.
Shqipëria barazoi me Danimarkën 0:0 të premten, kurse të hënën ndeshet kundër Portugalisë.