Kosovarët, më lirë me aeroplan se me veturë

Për kalim në Kroaci, kompanitë kosovare të sigurimeve aplikojnë tarifa njëmujore në vlerë 250 euro

Mospërfshirja e Kosovës në Kartonin e Gjelbër të Evropës po i kushton kosovarëve me pagesa ekstrem të shtrenjta për kalim nëpër shtetet e rajonit. Paradoksi më i madh është nëpër shtetet e ish-Jugosllavisë, nëpër të cilat policat kufitare të sigurimit kushtojnë shtrenjtë se udhëtimi me aeroplanë.

Për kalim në Kroaci, kompanitë kosovare të sigurimeve aplikojnë tarifa njëmujore në vlerë 250 euro. Pagesa e policës njëmujore të sigurimit, plus shpenzimet për derivate dhe për pagesën e autostradave, e bëjnë udhëtimin me automjete për kosovarët në këtë shtet më të shtrenjtë me veturë sesa me aeroplan.

Për dallim nga Kroacia, polica njëmujore e sigurimit për të shkuar në një vend tjetër bregdetar, Greqi, është hiç më pak se 180 euro, apo 150 euro për në Bosnjë dhe Hercegovinë, etj. Ndërsa kalimi në Serbi është pagesa TPL-plus në vlerë 40 euro plus 5 euro dita e pagesës për targa RKS.