Rusia i vë embargo Shqipërisë

Federata Ruse ka zgjeruar listës së vendeve të sanksionuara prej saj për shkak të qëndrimit pro-perëndimor. Në këtë listë është edhe embargoja për produktet e Shqipërisë

Federata Ruse ka zgjeruar listën e ndëshkimeve për shtetet që kanë përkrahur bllokadën e shteteve perëndimore kundrejt Moskës. Në këtë listë ka përfshirë edhe Shqipërinë, Malin e Zi, Islandën dhe Lihtenshtejnin. Bllokada ruse për Shqipërinë përfshinë embargon ndaj produkteve bujqësore.

Ka qenë vetë kryeministri Dmitry Medvedev që ka deklaruar se, embargoja ndaj importit të ushqimeve do të aplikohet tashmë edhe ndaj Shqipërisë, Malit të Zi, Islandës dhe Lihtenshtejnit.

“Përfshirja e këtyre vendeve në listën e sanksioneve është një lëvizje e vetëdijshme, që do të thotë një kundërmasë nga ana jonë ndaj atyre që na kanë vendosur sanksione”, ka thënë Medvedev në mbledhjen e kabinetit qeveritar, raporton TCH.

Ai ka shtuar se edhe Ukraina mund të përfshihet në listën në fjalë në vitin 2016 nëse marrëveshja ekonomike mes Kievit dhe Bashkimit Evropian hyn në fuqi. Embargoja e paralajmëruar më herët gjatë muajit përfshin produktet e mishit, peshkut, djathit, frutat dhe perimet.

Ajo vjen pasi BE dhe Shtetet e Bashkuara vendosën së fundmi sanksione të reja ndaj Rusisë për shkak të aneksimit të Krimesë dhe aksioneve ushtarake në lindje të Ukrainës.

Gjatë mbledhjes së kabinetit të tij, Medvedev ka shtuar se anti-sanksionet i kanë dhënë një nxitje të fortë agrikulturës vendase dhe nuk kanë shkaktuar shkurtime të rezervave ushqimore.
Ndryshe, Shqipëria dhe Kosova janë radhitur në krahun e shteteve perëndimore dhe SHBA-ve, që i kanë vënë sanksione Rusisë për shkak të aneksimit të Krimesë dhe mbështetjes së separatistëve pro-rus në konfliktin e Ukrainës. Sanksionet i janë vënë dy vjet më parë.