Riatdhesohen 70 azilkërkues shqiptarë

Ky është grupi i tretë që dëbohet nga Gjermania. Nesër do të kthehen 125 shqiptarë të tjerë, që do të vijnë vullnetarisht

Një aeroplan me 70 refugjatë shqiptarë ka aterruar në aeroportin e Rinasit në Tiranë, pasi atyre iu kishte refuzuar kërkesa për azil në Gjermani. Mes të rikthyerve kishte edhe gra e fëmijë. Azilkërkuesit e rikthyer kanë treguar se nuk u njoftuan për dëbimin dhe se autoritetet u thanë se do t’u ndryshonin shtëpinë.

“Nuk na njoftuan, na thanë që do t’ju ndryshojmë shtëpitë”, ka treguar një azilkërkues. Mes të kthyerve kishte nga ata që kishin shkuar në Gjermani për përfitim azili që prej muajit janar, raporton shekulli.

Ambasada e Gjermanisë njoftoi dje për kthimin e tyre, ndërsa bëri me dije se të enjten do të kthehen 125 shqiptarë të tjerë, të cilët kanë pranuar që të këthehen vullnetarisht. Në njoftimin e ambasadës thuhej se të mërkurën dhe të enjten do të kthehen në atdhe dy avionë charter me 195 azilkërkues shqiptarë.

Berlini zyrtar ka ritheksuar se nuk do të ketë azil ekonomik në Gjermani, ndërsa ka bërë apel që qytetarët shqiptarë të mos e ndërmarrin këtë iniciativë, pasi do të penalizohen.