Tetovë, zbulohet trupi i pajetë i 61 vjeçarit Raif Jusufi

Trupi i pajetë i Raif Jusufit, i cili konsiderohej i zhdukur nga disa e vërshimeve, u gjet në afërsi të pikës pagesore në dalje të Tetovës për në Gostivar

Pas dy ditë kërkimesh, është gjetur trupi i pajetë i 61 vjeçarit Raif Jusufi nga fshati Lisec, i cili u zhduk gjatë vërshimeve vdekjeprurëse në rajonin e Tetovës. Jusufi, i cili konsiderohej i zhdukur, u gjet në afërsi të pikës pagesore në dalje të Tetovës për në Gostivar.

Trupin e pajetë të tij e kanë gjetur disa persona, të cilët kanë qenë duke mbledhur hekur në afëri të lumit, disa kilometra larg ku ai është zhdukur.

Raif Jusufi në ditën e përmbytjeve ka qenë në bjeshkë bashkë me nipin e tij 7 vjeçar, i cili gjithashtu ka humbur jetën. Gjysh e nip ishin duke i ruajtur delet kur ndodhi fatkeqësia natyrore e të hënës, e cila la pas edhe katër person të tjerë të vdekur,  një fëmije tjetër të zhdukur, 20 të lënduar dhe rreth 400 shtëpi të prekura nga vërshimet.

Në anën tjetër në Shipkovicë janë duke vazhduar kërkimet për gjetjen e vajëses 6 vjeçare.

Deri tani, ekipet e kërkimit pranojnë se nuk kanë gjetur asnjë gjurmë të saj. Në operacionet e kërkimit, përveç pjesëtarëve të Ushtrisë dhe Drejtorisë për Mbrojtje dhe Shpëtim është angazhuar thuajse i gjithë fshati, ndërsa kërkimi po udhëhiqet edhe me qentë e ushtrisë të trajnuar për gjetje kufomash.