Vuçiç për azilantët serbë: „Ata i duan vetëm paratë gjermane“

Gazeta ia kujton lexuesit të saj qëndrimet aspak të moderuara dhe rolin që premieri i tashëm serb ka pasur në raport me luftën në Bosnjë, si i besueshëm i ultranacionalistit Sheshel

Kështu është shprehur kryeministri serb Vuçiç në një intervistë dhënë gazetës gjermane “Süddeutsche Zeitung” duke folur për refugjatët nga vendi i tij që provojnë fatin në Gjermani. “Ata nuk janë azilkërkues. Ata duan vetëm paratë gjermane”, ka precizuar ai.

Serbia po e bën më të mirën për të përmirësuar standardin jetësor të njerëzve në vend dhe për këtë nevojitet edhe ndihma gjermane, ka thënë Vuçiç më tutje.

Ajo që shqetëson më shumë janë kushtet jetësore të romëve, të cilët ikin kryesisht në drejtim të Gjermanisë. Por Vuçiç konsideron se mbështetja gjermane për azilkërkuesit përbën një burim të konsiderueshëm financiar për ta, transmeton albinfo.ch gazetën gjermane. Paga mesatare në Serbi është 380 euro, shkruan Süddeutsche Zeitung.

Kryeministri serb në intervistën për gazetën gjermane flet edhe për situatën politike në Serbi në raport me Bosnjën, Kosovën etj. Thotë se është një promovues i pajtimit në mes të ish palëve ndërluftuese dhe paraqitet si njeri i moderuar tek kritikon bashkëkombësit e tij në Republika Srpska rreth referendumit që do ta mbajnë në shtator për ndarje nga Bosnja.

Megjithatë, gazeta “SZ” ia kujton lexuesit të saj qëndrimet aspak të moderuara dhe rolin që premieri i tashëm serb ka pasur në raport me luftën në Bosnjë, si militant i madh dhe i besueshëm i ultranacionalistit Sheshel, përcjell albinfo.ch.

Lidhur me Kosovën, Vuçiç ka thënë se “Po bëjmë sa po mundemi për të shtendosur situatën me kosovarët. Serbët janë pjesë e qeverisë dhe jetës politike në Kosovë”. Por ai ka tërhequr vërejtjen që të mos “mbingarkohen qytetarët serbë” duke u kërkuar që ta njohin Kosovën si shtet.