Policia e Kosovës, me uniforma të reja

Në Akademinë e Kosovës për Siguri Publike diplomoi gjenerata e 52-të e Policisë së Kosovës si dhe u prezantua uniforma e re e Policisë së Kosovës

Policisë së Kosovës të premten iu bashkuan edhe 141 kadetë të rinj, që i përkasin gjeneratës së 52-të të policisë, që u trajnuan intensivisht në Akademinë e Kosovës për Siguri Publike (AKSP). Po ashtu Policia e Kosovës në ceremoninë zyrtare, prezantoi edhe uniformat e reja.

Në ceremoninë e diplomimit, ministri i Punëve të Brendshme (MPB), Skender Hyseni, tha se Policia e Kosovës është një forcë demokratike, shumë funksionale dhe më e mira në rajon.

“Do të jeni në shërbim të qytetarëve të Kosovës, në shërbim të sigurisë dhe në shërbimit të mirëqenies së secilit qytetar të vendit”, tha ministri Hyseni duke uruar kadetëve policor suksese në punën e tyre. Ai ka ftuar kadetët që të jenë pjesë e Policisë së Kosovës, e cila siç tha ai deri më sot ka dhënë prova të jashtëzakonshme të një punë të shkëlqyeshme.

Ndërsa Drejtori i Përgjithshëm i Policisë së Kosovës, Shpend Maxhuni kërkoi nga kadetët e rinj të jenë të disiplinuar, të arsimuar, të trajnuar mirë dhe të aftë fizikisht për të mbrojtur rendin dhe ligjin.

“Me betimin tuaj, ju zotoheni për kryerjen e detyrave me kompetencat dhe autorizimet zyrtare me përgjegjësi, profesionalizëm, korrektësi, efikasitet, me drejtësi, integritet dhe paanshmëri që do t’i mbroni të drejtat e njeriut dhe të respektoni të barabartë të gjithë qytetarët pa dallime”, tha ai.