Nesër Gjermania kthen 240 emigrantë kosovarë

Këta refugjatë i përkasin valës së fundit të kosovarëve që kanë ikur në Gjermani. Sipas autoriteteve gjermane, shumica prej tyre do të kthehen vullnetarisht

Autoritetet gjermane kanë paralajmëruar se nesër me 2 qershor, do të riatdhesojnë në Kosovë edhe një kontingjent me 240 refugjatë kosovarë. Këta refugjatë i përkasin valës së fundit të kosovarëve që kanë ikur në Gjermani, në fund të vitit 2014, apo në fillim të këtij viti.

“Nesër është paralajmëruar se Gjermania do të kthej rreth 240 persona ndërkaq prej tyre 209 do të kthehen me forcë ndërsa pjesa tjetër do të kthehen me vetëdëshirë meqenëse kështu kanë kërkuar ata”, theksoi për KosovaLive, Valon Krasniqi zyrtar për migracion në Ministrinë e Punëve të Brendshme të Kosovës.

Ai bëri të ditur se që nga 1 janari i këtij viti e deri më tash, numri i personave të kthyer nga shtete tjera perëndimore ka shkuar në 7.500, prej tyre 64 për qind të kthyer në mënyrë vullnetare.

“Që të gjithë i përkasin valës së fundit të migrimit. Rreth 64 për qind janë të kthyer në mënyrë vullnetare e që është një dallim nga viti i kaluar sepse vitin e kaluar kanë qenë të kthyer 70 për qind me forcë”, tha Krasniqi.

Sipas tij, vetëm brenda dy javësh, numri i të kthyerve nga shtetet perëndimore ka mbërritur në mbi 1000 ndërsa ka shtuar se edhe për datën 11 qershor është paralajmëruar një kthim tjetër po ashtu, nga shteti gjerman.

“Nga shtetet tjera kemi kthim më pak, kemi paralajmërime nga Suedia që gjatë verës të identifikoj kthimin por edhe shtetet tjera, Austria, Belgjika, Franca, Zvicra. Megjithatë në bazë të statistikave, Gjermania është duke dominuar deri më tash për kthimin e kosovarëve”, deklaroi Krasniqi.