Gjilani prezantohet në Panairin e Cyrihut

Në Cyrih, në Panairin “Investment Management Exhibition”, Gjilani do të shpalosë ndërtimin e objekteve banesore afariste dhe projekte rekreative për zhvillimin turistik

Komuna e Gjilanit do t’i prezantojë rezuset e saja urbane dhe turistike para investitorëve të huaj në Panairin Ndërkombëtarë “Investment Management Exhibition”, që do të mbahet në Cyrih të Zvicrës nga data 19 deri më 21 maj. Kështu njoftoi Zyra për Informim e Komunës së Gjilanit.

Sipas këtij njoftimi, në vazhdën e aktiviteteve të Gjilanit në synimin e përmirësimit të mirëqenies së qytetarëve dhe zhvillimin ekonomik, Komuna do të shpalosë projektet e saj që përfshijnë gjetjen e investitorëve për riplanifikimin dhe ridizajnimin e objekteve komunale, ndërtimi i objekteve banesore afariste dhe projekte rekreative për zhvillimin e turizmit në Komunën e Gjilanit.

Në panair do të hapet një tendë e Gjilanit për prezantim profesional të projekteve komunale, duke përshirë edhe video promovuese. Komuna tashmë ka përgatitur një pako me materiale promovuese që do t’u shpërndahet investitorëve potencialë në panair.

Kryetari Lutfi Haziri do të mbajë një prezantim mbi rëndësinë dhe potencialin për investime në komunë, e cila ka aplikuar edhe për qytetin si model më i mirë, një çmim prestigjioz që jepet nga organizatorët. Komuna do të vazhdojë me projekte të tilla duke synuar gjithmonë që të jetë në shërbim të qytetarëve, thuhet në njoftim.