Avio-kompanitë, marrëveshje për ngritjen e biletave  

Drejtori i Autoritetit të Aviacionit Civil, Dritan Gjonbalaj, ka thënë se rritja e madhe e çmimeve të biletave gjatë verës, ngjallë dyshim se kompanitë kanë marrëveshje mes vete

Foto ilustrim

Avio-kompanitë që operojnë në Kosovë dyshohet se kanë bërë një marrëveshje për rritjen e biletave gjatë sezonit të verës. Kështu ka deklaruar drejtori i Autoritetit të Aviacionit Civil në Kosovë, Dritan Gjonbalaj, pas pyetjeve të bëra nga anëtarë të Komisionit të Zhvillimit Ekonomik.

Gjonbalaj ka thënë se rritja e madhe e çmimeve të biletave në kohë vere është sinjal që jep dyshime se avio-kompanitë kanë marrëveshje mes vete dhe se për këtë duhet hetuar nga Autoriteti Kosovar i Konkurrencës.

Gjonbalaj ka thënë se kjo mund të jetë një nga arsyet pse më 2014 ka pasur 14% më pak udhëtarë sesa më 2013, raporton KTV.

Drejtuesit e Autoritetit të Aviacionit Civil kanë thënë se vitin e kaluar kanë pasur mbi 170 raporte për shkelje të rregullave të komunikacionit ajror, një nga më seriozet ka qenë ajo e udhëtimit të kryetares së Gjakovës, Mimoza Kusari-Lila me aeroplan.

Për këtë të fundit kanë thënë të kenë dënuar pilotin, i cili ishte lajmëruar se Aeroporti i Gjakovës është i mbyllur dhe se nuk mund të shfrytëzohet për fluturime, mirëpo ai nuk kishte marrë parasysh paralajmërimet, duke rrezikuar transportin ajror.