60 për qind e fëmijëve rrihen nga prindërit

61.4 për qind e fëmijëve të anketuar deri në moshën 14 vjeç, deklaruan se kishin pësuar dhunë psikologjike dhe fizike nga familjarët

Më shumë se 60 për qind e fëmijëve kosovarë keqtrajtohen fizikisht nga prindërit e tyre, si formë për disiplinim. Kështu thuhet në anketën e fundit të Grupimeve të Treguesve të Shumëfishtë në Republikën e Kosovës (2013-2014) publikuar së fudmi, në bashkëpunim me Agjencinë e Statistikave të Kosovës.

Sipas kësaj ankete, 61.4 për qind e fëmijëve të anketuar deri në moshën 14 vjeç, deklaruan se kishin pësuar dhunë psikologjike dhe fizike nga familjarët gjatë muajit të fundit nga data e intervistimit.

Nga ky grup, 24 për qind, ose afërsisht 1 në çdo 4 fëmijë, pohuan se ishin ndëshkuar fizikisht, me 6 për qind të rasteve që thanë se kishin pësuar ndëshkim të rëndë fizik, raporton Lallxo.com. Ndërsa 31 për qind e fëmijëve thanë se nuk kishin përjetuar dhunë të asnjë lloji, qoftë fizike apo psikologjike.

Ndërsa, përgjigjet e fëmijëve nga etnitë e tjera (romë, shkali dhe egjiptianë), të cilat janë trajtuar në një pyetësor më vete, raportuan për dhunë fizike në masën 40 për qind, pra për 4 fëmijë në çdo 10 syresh.

Sipas të njëjtit vrojtim të UNICEF, kultura e disiplinimit të fëmijëve përmes dhunës është e përhapur, jo vetëm në Kosovë, por edhe në vende të tjera të Ballkanit. Në Malin e Zi, 69 për qind e fëmijëve të intervistuar (viti 2013) deklaruan se kishin qenë viktima të dhunës psikologjike apo fizike. Nga ky numër, 30.8 për qind, pra gati 1 në 3 fëmijë, deklaruan se mbi ta ishte ushtruar dhunë fizike.

Çuditërisht, familjarët e rritur të shprehur në favor të disiplinimit të dhunshëm, ishin në përqindje shumë të vogël. “Vetëm 7 për qind e të anketuarve në familje besonin se ndëshkimi fizik ishte pjesë e nevojshme e edukimit të fëmijëve, çka përbën një kontrast të theksuar me normën e përhapur të disiplinimit fizik”, thuhet në shënimet e UNICEF për Malin e Zi.

Dhuna e ashpër fizike nënkupton goditjen e fëmijës në kokë, veshë apo fytyrë, apo goditjen e fëmijës me forcë dhe në mënyrë të përsëritur. Kjo anketë ndërkombëtare ende nuk realizohet në Shqipëri si dhe në vende të tjera.

Një dhunë e tillë inskenohet edhe në serialin humoristik “Çka ka shpia”, ku Hamdiu djali i madh i Xhekut, fëmijë problematik dhe disi i ngadaltë në veprime që kërkojnë inteligjencë nën mesataren, shpesh rrihet nga prindi. Madje Xheku krenohet që e ka disiplinuar fëmijën nga fillimi, duke i hyrë dajak.