Gjithçka e qartë: Zvicra do ta kalojë dimrin pa mungesë energjie

Temperaturat e buta bënë të mundur të shmangej mungesa e energjisë. Pra, u përdor më pak gaz

Komisioni Federal i Energjisë Elektrike, Elcom, është i bindur se Zvicra do të ketë energji elektrike të mjaftueshme gjatë gjithë kohës, në muajt e dimrit, transmeton albinfo.ch. Temperaturat e buta ishin vendimtare për faktin se u bë e mundur të shmangej mungesa e energjisë. Pra, u përdor më pak gaz.

Në gjithë Evropën objektet e depozitimit të gazit janë aktualisht më pak të zbrazëta se në vitet e tjera, shkruan sda.ch. Përveç kësaj, më shumë energji bërthamore është sërish e disponueshme në Francë, të cilën Zvicra mund ta importojë.

Në Zvicër, nga ana tjetër, rezervuarët e liqeneve akumuluese aktualisht janë të mbushur mirë. Niveli i mbushjes është rreth 75 për qind, ndërsa normalja në këtë periudhë të vitit është 55 deri në 60 për qind.

Nga ana tjetër, Zyra Federale e Energjisë Zvicerane (BFE) e vlerësoi situatën e furnizimit me energji elektrike si  “të tensionuar në vazhdimësi”. Ky vlerësim është bërë në “Energy Dashboard Switzerland” të publikuar në mes të dhjetorit, përcjell albinfo.ch. Megjithatë, furnizimi me energji elektrike është i garantuar. BFE bën të njëjtin vlerësim për gazin.

Portali i konsumit të energjisë i BFE ka pesë nivele. Niveli 1 është “normal”, niveli 2 do të thotë “i tensionuar”, niveli 5 do të ishte “furnizim joadekuat”.

---