Inflacioni në Gjermani në maj, gati tetë për qind

pixabay

Bëhet e ditur se norma e inflacionit në Gjermani vazhdoi të rritet në maj me 7.9 për qind, me çmime më të larta krahasuar me të njëjtën periudhë të vitit të kaluar, rritja më e lartë e regjistruar e çmimeve në Gjermani që nga kriza e naftës në vitet 1970, njoftoi sot Byroja Federale e Statistikave në Wiesbaden, përcjell albinfo.ch.

Norma prej 7.9 për qind është më e lartë se vlerësimet e ekonomistëve kryesorë që prisnin një normë inflacioni prej 7.6 për qind për muajin maj.

Ashtu si me rritjen e krahasueshme të çmimeve në 1973/1974, shkaku kryesor është rritja e çmimeve të energjisë.

“Që nga fillimi i luftës në Ukrainë, çmimet e energjisë në veçanti janë rritur ndjeshëm, gjë që ka ndikuar në normën e lartë të inflacionit”, thuhet në një deklaratë të Byrosë Federale të Statistikave.

Sipas statistikave më të fundit, çmimet e energjisë dhe ushqimeve u rritën më së shumti, me 38.3 për qind, me 11.1 për qind.

Inflacioni ishte gjithashtu për shkak të ndërprerjeve të zinxhirit të furnizimit si rezultat i ndërprerjeve gjatë krizës së koronës dhe mungesës së stafit në industrinë e logjistikës.

Ministri i Financave, Christian Lindner, tha se “inflacioni duhet të frenohet” dhe njoftoi një rikthim në masat shtrënguese dhe zero borxhin që në fillim të vitit të ardhshëm.