Zvicra ndihmon në punësimin e 3 mijë personave në Kosovë

Në periudhën 2021-2024 edhe 3000 të rinj pritet të gjejnë punë përmes këtij projekti

Ambasada e Zvicrës në Kosovë dhe Ministria e Punës dhe Mirëqenies Sociale e Kosovës kanë nënshkruar marrëveshje të re për t’i përmirësuar perspektivat e punësimit për të rinjtë dhe të rejat në Kosovë në katër vitet e ardhshme.

Sipas njoftimit, ambasadori i Zvicrës në Kosovë dhe ministri në detyrë, Skënder Reçica kanë nënshkruar marrëveshje për vazhdimin e projektit “Enhancing Youth Employment” edhe për katër vitet e ardhshme.

“Qëllimi i këtij projekti është zvogëlimi i shkallës së lartë të papunësisë së të rinjve, duke lehtësuar fazën e tranzicionit nga shkollimi në punë për të rinjtë dhe të reja. Me këtë rast ambasadori Kolly theksoi rëndësinë e angazhimit të ngushtë të sektorit privat si në nivelin qendror ashtu edhe në atë lokal. Iniciativa bazohet në të arriturat dhe mësimet e nxjerra në fazat e mëhershme (2013-2020). Falë zhvillimit të aftësive të rëndësishme për tregun e punës dhe sigurimit të informacionit më efikas për sektorin privat dhe për punëkërkuesit, mbi 5.000 të rinj kanë gjetur punë gjatë tetë viteve të fundit”, thuhet në njoftim, përcjell albinfo.ch.

Sipas njoftimit, në periudhën 2021-2024 edhe 3000 të rinj pritet të gjejnë punë përmes këtij projekti.

Masat mbështetëse do të përfshijnë a) trajnime joformale dhe të drejtuara nga industria që synojnë përputhjen e aftësive të tyre me nevojat e tregut të punës; b) shërbime të përmirësuara të udhëzimit në karrierë dhe ndërmjetësimit në punë.

Projekti (EUR 4’762’000) financohet nga Zyra zvicerane për zhvillim dhe bashkëpunim (SDC) dhe zbatohet nga një konsorciumi midis Helvetas Swiss Intercooperation dhe Management Development Associates.

---