Përplasje në Kuvendin e Kosovës

Partitë fajësojnë njëra-tjetrën, si rezultat i pikëvështrimeve të ndryshme të realitetit politik në vend.

Deputetët e Kuvendit të Kosovës të pushtetit dhe opozitës, duke u nisur nga këndvështrime të ndryshme, kanë deklaruar se gjendja në Kuvendin e Kosovës ka degraduar.

Gjatë seancës të së premtes, më 18 dhjetor, në Kuvendin e Kosovës, deputetët e Lëvizjes Vetëvendosje, duke goditur tavolinat e tyre dhe duke brohoritur fjalën “Jashtë”, i kanë bërë thirrje zëvendëskryeministrit Driton Selmanaj që të largohet nga salla ku po mbahej seanca, që në momentin që ai kishte hyrë në sallë.

Lëvizja Vetëvendosje e kundërshton praninë e zëvendëskryeministrit Selmanaj në punën e Kuvendit, për shkak se ai më herët pati deklaruar që “çështja e të pagjeturve është e ezauruar”. Lëvizja Vetëvendosje kërkon dorëheqjen e Selmanajt.

Kryesuesja e seancës, nënkryetarja e Kuvendit të Kosovës nga radhët e partisë opozitare, Lëvizja Vetëvendosje, Arbërie Nagavci, ka vendosur që të bëjë pauzë të seancës, për shkak pamundësisë për të krijuar kushte për mbajtjen e seancës.

Nga ana tjetër, zëvendëskryeministri i Kosovës, Driton Selmanaj, ka reaguar pas protestave të VV-së, të cilat ndërprenë seancat e sotme të Kuvendit.

Në një postim në Facebook, Selmanaj ka publikuar një fotografi nga Kuvendi me deputetët e LDK-së.

---