Hoti i përgjigjet Haradinajt: S’ka nevojë për konferencë të liderëve

Avdullah Hoti e ka refuzuar ofertën e Ramush Haradinajt për një konferencë të liderëve për t’u koordinuar në dialogun Kosovë-Serbi.

Zëvendëskryeministri i parë ka thënë se institucionet që kanë dalë nga zgjedhjet e fundit bartin legjitimitetin për të marrë përgjegjësitë bazuar në ligje e Kushtetutë edhe sa i përket dialogut me Serbinë.

“Kosova ka institucione legjitime, të dala nga zgjedhjet demokratike të 6 tetorit, të cilat bartin përgjegjësitë kushtetuese, përfshirë edhe dialogun me vendin fqinj, Serbinë. Nuk ka nevojë për asnjë konferencë për këtë qëllim, të brendshme e as të jashtme”, ka reaguar Hoti në Facebook.

“Duhet vetem ushtrim i përgjegjësive kushtetuese nga secili. Kryeministri duhet të marrë përsipër dialogun, ashtu si e definon edhe aktgjykimi i Gjykatës Kushtetuese. Presidenti duhet të qëndrojeë brenda kompetencave të veta kushtetuese”, ka shtuar ai.