Përkundër rreziqeve, nuk hiqet dorë nga shpimet gjeotermike

"Është akoma herët të flitet për dështimin e energjisë gjeotermike në Zvicër. Duhet së pari të priten rezultatet e analizës e mandej të flitet për pasojat"

Berna zyrtare nuk heq dorë nga stimulimi i mënyrave alternative të përfitimit të energjisë, përshirë këtu edhe shpimet e thella për energji gjeotermike. Kjo u bë e ditur pas tërmetit të djeshëm që u konstatua se erdhi si pasojë e një shpimi të tillë, të bërë në thellësi prej 4 mijë metrash në St. Gallen. Ndonëse punimet përkohësisht janë ndërprerë, Qeveria e Zvicrës këmbëngul për krijimin e kushteve për plotësimin e 5 deri 10% të nevojave me energji, nga toka.

Sipas Marianne Zünd, zëdhënëse e Entit Federal për Energji (BFE) “është akoma herët të flitet për dështimin e energjisë gjeotermike në Zvicër. Duhet së pari të priten rezultatet e analizës për rastin e mandej të flitet për pasojat e mundshme” , shkruan tagblatt.ch.

Ajo ka shtuar se rasti ë ka ndodhur në St. Gallen nuk është e thënë të ndodhë edhe në vendet tjera ku ka shpime të tilla. Kjo varet nga përbërja e tokës dhe elemente të tjera. Por, sidoqoftë secili projekt pionier përballet me vështirësi të fillimit dhe me të panjohura, pasi që teknologjia përkatëse është ende në zhvillim e sipër.

Krahas projektit në St. Gallen, në fazë të ngjashme ndodhet edhe një tjetër në Lavey les-Bains.

Zünd ka thënë se edhe nëse detyrohet të heqë dorë nga energjia gjeotermike, Zvicra do të arrijë ta kompensojë atë. Sipas planeve të BFE-së, Zvicra në vitin 2050 do të ketë nevojë për 60 terawat orë energji. Energjia gjeotermike do të përbëjë rreth 6% në këtë sasi.