Ambasada gjermane kundërshton ndryshimet në ligjin për Dhomat e Specializuara

Ambasada e Gjermanisë në Prishtinë ka shprehur shqetësim të madh lidhur me ndryshimet që Kuvendi i Kosovës miratoi në Ligjin për Dhomat e Specializuara të Kosovës në Hagë.

Ndryshimet u votuan të martën në mbrëmje dhe synojnë të kufizojnë kompetencat e kësaj gjykate. Në një deklaratë për Radion Evropa e Lirë, zëdhënësja e Ambasadës Gjermane, Catalina Heine, theksoi se Dhomat e Specializuara janë pjesë e sistemit gjyqësor të Kosovës dhe duhet të funksionojnë në mënyrë të pavarur.

Sipas saj, institucioni është krijuar mbi bazën e ligjeve dhe Kushtetutës së Kosovës, me qëllim që të sigurojë përgjegjësi ligjore dhe drejtësi për viktimat e të gjitha komuniteteve. Për këtë arsye, Berlini konsideron se pavarësia e gjykatës duhet të ruhet plotësisht.

Gjermania ka bërë të ditur gjithashtu se mbështet qëndrimin e Bashkimit Evropian, i cili më herët kishte paralajmëruar se ndryshimet e miratuara mund të jenë në kundërshtim me detyrimet ndërkombëtare të Kosovës.

BE-ja i ka kërkuar Kosovës që të respektojë obligimet e saj ndërkombëtare dhe të garantojë pavarësinë e Dhomave të Specializuara, si dhe vazhdimin e proceseve që synojnë drejtësinë për viktimat dhe familjet e tyre.