Novartis shpërblen Vasellën me 5 milionë franga

Ai shpërblehet për shërbimet e tij si anëtar i menaxhmentit të kompanive simotra të Novartisit dhe për mbështetjen e presidentit të ri të Bordit të Drejtorëve.

Pak muaj pasi ka kaluar zhurma e aferës për premtimin ish shefit të koncernit farmaceutik Novartis Daniel Vasella për t`i paguar 72 milion franga si “zhdëmtim” për lënien e punës, gjiganti i farmacisë nga Bazeli ka vendosur që megjithatë ta paguajë ish shefin, ndonëse me një shumë dukshëm më të vogël.

Novartis dhe Vasella janë pajtuar tashmë që për periudhën 9 mujore nga shkurti 2013 deri në tetor këtij të undit t`i paguhen 4.9 milionë franga. Me këtë shumë Vasella do të shpërblehet për shërbimet e tij si anëtar i menaxhmentit të kompanive simotra të Novartisit dhe për mbështetjen e presidentit të ri të Bordit të Drejtorëve.

Novartis ka ngritur gjatë këtij gjashtëmujori qarkullimin e tij për 2 për qind në 28.5 miliardë dollarë. Ndërsa vetëm fitimi i pastër i realizuar gjatë kësaj periudhe ka qenë 5 miliardë dollarë ose 1 për qind më shumë se në periudhën e njëjtë të vitit 2012.

Premtimi në muajin shkurt për t`i paguar 72 milionë franga Vasellës ishte shndërruar në skandal numër një në Zvicër dhe shkas për t`i dhënë zjarr fushatës “kundër zhvatësve”. Pas shndërrimit të këtij premtimi në aferë, Vasella kishte hequr dorë nga marrja e shpërblimit në fjalë.