Në autostradë, me karrocë invalidi

Ngasësja e karrocës ka shkaktuar një bllokadë që ka zgjatur rreth 30 minuta në autostradën A4 në Schafhausen

Një grua 62 vjeçe me karrocën e saj të invalidit në rrethana të panjohura është gjetur të hënën në autostradë. Me këtë rast ajo ka shkaktuar një bllokadë që ka zgjatur rreth 30 minuta  në autostradën A4 në Schafhausen.

Me shpejtësinë e saj maksimale 10 km në orë, ngasësja sigurisht nuk ka rrezikuar që të kapej nga radari, por ka nervozuar në kulm pjesëmarrësit tjerë të komunikacionit.  

Vetëm pasi që kolona e shkaktuar nga ajo tashme ishte bërë me kilometra e gjatë, në tunelin e afërm atë e ka regjistruar një kamerë. Kështu, është dashur të dërgohej patrulla policore për të ndaluar invaliden e guximshme.

Policia ende nuk ka mundur të sqarojë arsyen për këtë veprim të gruas me karrocë. Sidoqoftë, ky piknik i saj nuk do të mbetet pa pasoja. Ndaj gruas pritet të bëhet një kallëzim penal.