Challandes: “Nuk po ia vjedhim lojtarët Zvicrës”

“Asnjë vend nuk vjedh lojtarë! Gjithmonë është lojtari ai që vendos. Dhe është e qartë se secili lojtar vendos për atë vend i cili i shërben më shumë karrierës së tij"

Keystone

Përzgjedhësi i ri i Kombëtares së Kosovës, trajneri zviceran  Bernard Challandes në një intervistë të publikuar sot në blick.ch ka folur rreth angazhimit të tij aktual në Kosovë.

Veç pyetjeve për shanset e përfaqësueses së re dhe rreth moshës së tij të shtyrë, atij i është shtruar edhe pyetja provokative nëse ai dëshiron “t`ia vjedhë Zvicrës lojtarët”, transmeton albinfo.ch. Këtë pyetje gazetari ia ka drejtuar kur Challandes ka thënë se shumica e lojtarëve të përfaqësueses kosovare vijnë nga jashtë, mes tjerash, edhe nga Zvicra.

“Asnjë vend nuk vjedh lojtarë! Gjithmonë është lojtari ai që vendos. Dhe është e qartë se secili lojtar vendos për atë vend i cili i shërben më shumë karrierës së tij. Nëse një lojtar ka shanse të luajë për Zvicrën, ai këtë edhe do ta bëjë. Pabvarësisht nga Kosova. Nuk është pa bazë fakti që futbollistë si Granit Xhaka dhe Xherdan Shaqiri luajnë për Zvicrën dhe  jo për Shqipërinë”.