“Makina e ardhmërisë” lëviz me hidrogjen dhe oksigjen të lëngët

Hayek thotë: "Ne tashmë e kemi testuar një makinë që vihet në lëvizje me hidrogjeni dhe oksigjeni në gjendje të lëngët...

Ka qenë një vizion i themeluesit të Swatch-it, të ndjerit Nicolas Hayek: të konstruktojë një veturë që lëviz me oksigjen dhe hidrogjen të lëngët. Trashëgimtari i tij në fronin e Swatch-it, Nick Hayek duket se do ta realizojë vizionin e babait.

Për të mundësuar konstruktimin e makinave që nuk dëmtojnë ambientin, Hayek-babai, kishte ngritur firmën Belenos. Hayek-i biri thotë për NZZam Sonntag: “Ne, në Biel-Bienne tashmë e kemi testuar një makinë që vihet në lëvizje me karburantin e zhvilluar nga instituti Paul-Scherrer”. Si lëndë që e vë në lëvizje makinën shërben hidrogjeni dhe oksigjeni në gjendje të lëngët, që mundësojnë një djegie shumë efikase.

“Mirëpo ne nuk e dimë akoma nëse automjeti do të mund të prodhohet me kosto të ulët apo jo dhe nëse performanca e tij do të jetë e mjaftueshme”, thotë Nick Hayek. Ndërkohë, në Belenos janë paraqitur tashmë mjaft klientë të gatshëm për të siguruar makinën e ardhmërisë.

Hapi i ardhshëm është ndërtimi i një pike ambientale karburantesh. “Çelulat solare në kulm të kësaj pike vejnë në lëvizje një impiant që prodhon oksigjen dhe hidrogjen të lëngët, të mjaftueshëm për një makinë me katër vende”. Por, pranon Hayek, “ne na duhen së paku edhe 4 deri në 5 vjet deri sa ky automjet të mund të komercializohet”.