Në mesjavë sfida e zjarrtë, Skënderbeu-Partizani i Beogradit

Të enjten nga ora 21:05 në Elbasan do të zhvillohet një përballje shumë interesante në mes Skënderbeut të Korçës dhe Partizanit të Beogradit, shkruan albinfo.ch.

Ky takim është i vlefshëm për grupet e Ligës së Evropës, derisa përballja e kthimi zhvillohet pas dy javësh në Beograd.

Klubi i Skënderbeut ka njoftuar se po bën të gjitha përgatitjet për këtë sfidë delikate, derisa tashmë biletat janë hedhur në treg, në Korçë, Elbasan, dhe Tiranë.

Por, edhe një numër i madh i shqiptarëve nga Kosova dhe Maqedonia pritet të përkrahin Skënderbeun në këtë përballje, që është e para në mes dy klubeve.

“‘Ujqërit’ në kërkim të fitores për të mbajtur hapur shanset për të kaluar më tej. Ju bëjmë thirrje tifozëve për mbështetje maksimale në këtë takim mjaft delikat. Bashkë më të fortë, të bashkuar për të vijuar ëndrrën evropiane”, thuhet në njoftimin e Skënderbeut.