Ndërtimtarët, aksion proteste për Kontratën e Punës

Sindikata Unia dhe Syna më 25 nëntor do të zhvillojnë aksione proteste në Gjenevë, Lozanë, Cyrih dhe Bernë

Në një komunikatë të përbashkëtpër medie, sindikata Unia dhe ajo Syna thërrasin anëtarësinë e tyre dhe punëtorët e ndërtimit që të dalin në protestën e cila mbahet të premten, më 25 nëntor 2011.

Sipas komunikatës, kërkesa e punëtorëve të ndërtimtarisë është realizimi i “Kontratës Kombëtare të Punës me më shumë mbrojtje”.

Shkas për protestën e ndërtimtarëve është dështimi i bisedimeve për Kontratën e re Kombëtare të Punës (KKP, shkurtesa në gjermanisht: LMV) për sektorin kryesor të ndërtimtarisë. Këtë dështim, sipas sindikalistëve e ka shkaktuar Shoqata e Mjeshtërve të Ndërtimtarisë (SBV, organizata që përfaqëson punëdhënësit dhe ndërmarrjet ndërtimore) më 2 nëntor 2011.

Kështu, përderisa SBV kërkon vazhdimin e kontratës së vjetër, ajo për Unia dhe Syna është e pamjaftueshme për rrethanat aktuale. Sipas këtyre, në sferën e ndërtimit ka një presion në rritje ndaj punëtorëve. “Vetëm në vitin e kaluar numri të punësuarve u zvogëlua për 3.5%, ndërsa përfitimi u rrit për 3.1%. Punëtorët druajnë edhe nga dumpingu, shtypja e pagave që shkaktohet nga firmat joserioze të cilat shpërndajnë më tej mandate nën-akorduese me paga shtypëse.

Këto sindikata njoftojnë se më 25 nëntor do të zhvillojnë aksione proteste në Gjenevë, Lozanë, Cyrih dhe Bernë. Më 2 dhjetor do të pasojnë aksionet e protestës edhe në Tiçino.