Abrashi: Së shpejti marrëveshja për sigurime sociale me Zvicrën

Ministri i Punës dhe Mirëqenies Sociale, Arban Abrashi është optimist se marrëveshja në mes Kosovës dhe Zvicrës, do të ratifikohet brenda këtij viti

Marrëveshja për sigurime sociale ndërmjet Konfederatës së Zvicrës dhe Qeverisë së Republikës së Kosovës pritet të finalizohet deri në gjysmën e këtij. Kështu ka deklaruar ministri i Punës dhe Mirëqenies Sociale, Arban Abrashi, sipas të cilit, raundi i parë i bisedimeve është mbajtur në janar të vitit 2017 përderisa raundi i dytë do të mbahet gjatë muajit prill të këtij viti.

“Besojmë se marrëveshja në mes të dy ministrive do të finalizohet deri në gjysmën e këtij viti, ndërsa procedura e mëtutjeshme parasheh që kjo marrëveshje të shkojë për ratifikim në parlamentet e të dyja vendeve sipas legjislacioneve përkatëse. Varësisht se kur do të ratifikohet marrëveshja në parlamentet përkatëse edhe do të hyjë në fuqi”, ka deklaruar Abrashi.

Ministri kosovar është optimist që edhe procedurat e ratifikimit do të shkojnë shpejt ashtu si edhe bashkëpunimi i suksesshëm në mes të dy ministrive përkatëse dhe se marrëveshja, siç tha ai, do të ratifikohet brenda këtij viti apo më së largu deri në gjysmën e parë të vitit 2018.

“Si rezultat i bashkëpunimit të suksesshëm në mes të Ministrisë së Punës dhe Mirëqenies Sociale me ministrinë përkatëse të Konfederatës së Zvicrës, qeveritë e dy vendeve në fund të vitit 2016 kanë aprovuar vendimin për fillimin e negociatave në mes të Republikës së Kosovës dhe Konfederatës Zvicerane për arritjen e një marrëveshje bilaterale në fushën e sigurimeve sociale”, ka thënë Abrashi për RTKlive.

Sipas tij, raundi i parë i bisedimeve është mbajtur në janar të vitit 2017 përderisa raundi i dytë do të mbahet gjatë muajit prill të këtij viti.