“Çmimi negativ” për dëbimin e kosovarit të integruar

I riu nga Kosova që ishte dëbuar në Serbi kishte 21 vjet qëndrim në Gjermani, ishte me status të rregullt dhe i integruar më së miri

Këshilli për refugjatë i republikës së Thuringenit (Gjermani) i ka ndarë sot “çmimin negativ” për dështimin e vitit gjykatës administrative të qytetit Gera të kësaj republike.

Kjo gjykatë e ka merituar këtë çmim për gabimin absurd që ka bërë, duke e dëbuar nga Gjermania në Serbi një kosovar. Absurdi qëndron në faktin se i riu nga Kosova kishte 21 vjet qëndrim në Gjermani, ishte me status të rregullt dhe i integruar më së miri.

As autoritetet për të huaj dhe as gjyqtarët administrativë nuk kishin marrë parasysh me këtë rast mungesën e perspektivës dhe të lidhjeve shoqërore të të riut me Serbinë, ku e kishin dëbuar. Veç kësaj, kosovarit nuk i kishte ndihmuar as njohja e statusit si rast i rëndë humanitare, i bërë nga shteti gjerman, shkruan gazeta “Thüringer Allgemeine”.

Këshilli për refugjatë me këtë rast ka ndarë edhe një çmim pozitiv. Ai i ka takuar organizatës së refugjatëve “The Voice Refugee Forum” nga Jena. Ky forum angazhohet prej disa vitesh për të drejtat e refugjatëve dhe lufton kundër përjashtimit që u bëhet atyre nga shoqëria pritëse.