Kosova do të ketë sheshin “Micheline Calmy-Rey”!

Pëlqimin për këtë akt, sipas medieve zvicerane, e ka dhënë ministri kosovar i punëve të jashtme, Enver Hoxhaj

Mediet zvicerane në edicionet e tyre të mbrëmjes i kanë bërë jehonë një njoftimi për emërtimin e një sheshi në Kosovë me emrin e presidentes në dorëheqje të Zvicrës, Micheline Calmy-Rey. Ajo me këtë rast do të nderohej si “Ambasadore e paqes në Ballkan”.

Pëlqimin për këtë akt, sipas medieve në fjalë, e ka dhënë ministri kosovar i punëve të jashtme, Enver Hoxhaj, duke pranuar kështu propozimin e ardhur nga agjencia e lajmeve “Presheva jonë” me seli në Gjenevë.

Në intervistën e dhënë për këtë agjenci, ministri Hoxhaj e ka quajtur “ide të mirë” këtë propozim. Ndërsa si vend ku një shesh mund të merrte emrin e presidentes dhe ministres së jashtme të Zvicrës mund të ishte Theranda (Suhareka) ku është dhe selia e misionit të Swisscoy.