Prangosen shtatë hakerë, “klonuan” kartela bankare

Sipas Policisë së Kosovës, arrestimi i tyre ka ardhur pas një hetimi të gjatë të këtij grupi, i cili në vijimësi është marrë me vepra penale

Policia e Kosovës ka arrestuar shtatë persona nën dyshimin e bazuar se kanë hyrë në sistem kompjuterik si dhe kanë falsifikuar kartelave bankare. Të gjithë të arrestuarit, sipas Policisë, janë kosovarë, ndërsa janë zbuluar nga Drejtoria për Hetimin e Krimit të Organizuar në bashkëpunim të plotë me prokurorin e shtetit nga Njësiti ekonomiko-financiar.

Sipas Policisë së Kosovës, arrestimi i tyre ka ardhur pas një hetimi të gjatë të këtij grupi, i cili në vijimësi është marrë me vepra penale.

“Pas hetimeve intensive të kryera për një kohë të gjatë, lidhur me veprimtarinë kriminale të një grupi, që në vazhdimësi merrej me kryerjen e veprave penale, të hyrjes në sisteme kompjuterike, klonim dhe keqpërdorim të kartelave bankare, ka realizuar me sukses një operacion të gjerë policor”, njifoton Policia e Kosovës.

Sipas të njëjtit njoftim, në urdhëresën e gjykatës kompetente, në rajonin e Prishtinës, Gjilanit dhe Ferizajt, janë realizuar operacione policore, dhe janë arrestuar shtatë persona të dyshuar: R. D. lindur  me 1998; F. XH.  lindur  me 1996; E. A. lindur me 1991; SH. J. lindur me 1987; SH. J. lindur me 1990; O. Z. lindur me 1995; V. H.  lindur me 1981.

Ndërsa, sipas Policisë,  janë sekuestruar si prova materiale: 1 pajisje për klonim të kartelave bankare; 27 kartela bankare; 6 kompjuterë; 11 telefona celularë; 9 laptopë; 4 armë kalibrash të ndryshme; 37 fishekë; 8220 euro para të gatshme-dyshohet se rrjedhin nga veprat e lartcekura…

Personat e dyshuar, në bazë të urdhrit të prokurorit, ndalohen për 48 orë në mbajtje policore, për të vazhduar me procedura të mëtejme gjyqësore, njofton Policia.