Të pasurve t`u ndalet “përqindja e solidaritetit”

Në këtë mënyrë, llogaritet se arka e papunësisë do të shlyejë 79 milionë franga nga shuma e gjithëmbarshme e borxhit të saj

Qeveria e Zvicrës i ka rekomanduar parlamentit që të miratojë një mocion të komisionit për ekonomi, për ngritjen e “Përqindjes së solidaritetit” në të mirë të arkave të sigurimit të papunësisë.

Sipas këtij rekomandimi, një përqindje e tillë duhet t`u ndalet të gjithë personave që kanë të ardhura vjetore më të larta se 315.000 franga. Duke bërë këtë veprim, qeveria po përmbush një kërkesë të të majtës, të bërë gjatë revidimit të ligjit mbi sigurimin e papunësisë.

Partitë e majta (SP dhe Grüne) atëbotë kishin bërë vërejtjen se, nëse nuk detyrohen të paguajnë edhe shuma plotësues për sigurimin në fjalë, personat me të ardhura shumë të larta po favorizohen krahas të tjerëve.

Me fjalë tjera, ata po paguajnë kontribute që përpjesëtimisht janë më të vogla se ato që paguajmë njerëzit me paga të ulëta.

Nëse rekomandimi kalon, titullarëve të pagave mbi 315 mijë franga  do t`u ndalet një për qind nga të ardhurat, në emër të kontributit për arkën e papunësisë.

Në këtë mënyrë, llogaritet se arka në fjalë do të shlyejë 79 milionë franga nga shuma e gjithëmbarshme e borxhit të saj.