Ahmeti: Maqedonia mund të ketë president shqiptar

Në një të ardhme të afërt Maqedonia mund të ketë një kryeministër ose një president shqiptar, ka deklaraur lideri i BDI-së, Ali Ahmeti

Lideri i BDI-së në Maqedoni ka thënë të jetë  shumë normale që pas disa viteve të bisedohet për një kryeministër ose një president. “Mendoj se është e rëndësishme që të dërgohet një mesazh, vecanërisht tek qytetarët maqedonas, se ky shtet është edhe i shqiptarëve”, ka pohuar Ahmeti për mediat maqedonase. “Maqedoninë duhet ta ndërtojmë të gjithë së bashku, duhet ta ndejmë si tonën dhe ta respektojmë, sepse qëllimi ynë i përbashkët është që në këtë shtet të jetojmë së bashku”, është shprehur ai. Në këtë mënyrë, sipas Ahmetit, përkatësia etnike e personit që do të mund të drejtojë një nga këto poste nuk do të jetë e rëndësishme. Kreu i BDI-së ka marrë si shembull rastin e dikasterit të mbrojtjes, të cilën pas zgjedhjeve të parakohshme e drejton një  shqiptar nga radhët e partisë së tij. “Ndoshta para disa vitesh nuk mund të mendohej që një shqiptar të ishte ministër i Mbrojtjes. Por ja që edhe kjo ndodhi. Nuk dua të parashikoj se cfarë do të ndodhë pas 4-5 viteve, por gjithcka do të varet nga zhvillimet e proceseve politike në vend dhe dialogut mes partnerëve politikë”, ka shtuar Ahmeti.