Shqiptari 30 vjeç vdes nën rrotët e trenit

Shtetasi 30 vjeçar i Shqipërisë, ishte duke ecur mbi binarë në drejtim të lokalitetit Brixen kur është goditur nga një tren mallrash

Natën në mes të të premtes dhe të shtunës në Klausen të Tirolit jugor (Itali) ka ndodhur një aksident i rëndë, me ç`rast një shqiptar ka humbur jetën nën rrotët e trenit.

Siç ka njoftuar një nëpunës i hekurudhave, tashmë i ndjeri, një shtetas 30 vjeçar i Shqipërisë, ishte duke ecur mbi binarë në drejtim të lokalitetit Brixen kur është goditur nga një tren mallrash. Lokomotivisti e kishte vënë re në kushte të errësirës njeriun që po ecte mbi binarë por meqë ishte shumë afër, nuk kishte mundësi të ndalonte trenin me kohë.

I godituri nga treni ka vdekur menjëherë në vendin e ngjarjes.

Mbetet e paqartë arsyeja përse ai nuk e kishte dëgjuar trenin që po afrohej. Prokuroria Shtetërore eBozen-it (Bolzano) ka urdhëruar fillimin e hetimeve lidhur me rastin. Trafiku hekurudhor si pasojë e aksidentit, ka qenë i bllokuar për rreth dy orë.

Aktualisht nuk ka informata më të hollësishme rreth aksidentit.