Stöhlker merr ofertën për anëtarësim në SVP-UDC

Sipas disa përfaqësuesve të SVP-UDC-së, Stöhlker është bërë "viktimë e një aparati arbitrar"

Bashkëpronari i firmës për marketing Fidel Stöhlker, i cili, për gjuhën e tij denigruese ndaj kosovarëve mund të përgjigjet penalisht, ka marrë mbështetje nga partia SVP-UDC.

Tri padi të ndryshme janë iniciuar ndaj Stöhlker, për faktin se ai, në blogun e tij i kishte quajtur kosovarët popull inferior dhe fundërrina. Nesër, e hënë, prokuroria e Cyrihut do të nisë procedurën kundër tij.

Por, Stöhlker tashmë ka marrë mbështetjen e partisë më të madhe të Zvicrës SVP-UDC, e cila tashmë është identifikuar me gjuhë të përafërt në raport me të huajt.

Sipas deputetit kantonal të kësaj partie dhe kandidatit për deputet nacional Claudio Zanetti, Stöhlke është “viktimë e një aparati arbitrar”. Ai, bashkë me kolegun tjetër nga kjo parti, Hans-Peter Amrein do të kërkojnë një mocion në parlamentin e Kantonit të Cyrihut lidhur me këtë problem.

Ata kërkojnë nga qeveria e kantonit përgjigjen përse është vënë në lëvizje prokurori publik në një rast si ky. Sipas tyre bëhet fjalë vetëm për “një qytetar, nën ndikimin e një vrasjeje të dyfishtë të bërë nga një shtetas i huaj dhe përballë një shkalle të lartë të delikuencës që kanë treguar shtetasit e atij shteti (Kosovës), ka dhënë një deklaratë të tillë emocionale”.

Zanetti me këtë rast i ofron Fidel Stöhlker-it hapur që të anëtarësohet në SVP-UDC.

Ndërkaq Stöhlker nuk ka probleme vetëm me shqiptarët e Kosovës, shkruan “Sonntags Zeitung”. Më 20 maj të këtij viti ai në twitter kishte shkruar: Michel Friedman, Eliot Spitzer, Dominique Strauss-Kahn, Mosche Katzav ose Roman Polanski. A ju kujton diçka kjo?” Të gjithë këta pesë burra ishin pjesë e aferave me femra dhe të pestët janë hebrenj.