Merkel i kërkon Tadiqit zgjidhje të mosmarrëveshjeve me Kosovën

Kancelarja gjermane, Angela Merkel, është takuar në Beograd me presidenti e Serbisë, Boris Tadiq, për të kërkuar nga ai që t’i zgjidhë mosmarrëveshjet me Kosovën.

Kancelarja Merkel ka thënë se do t’u tregojë liderëve serbë se një nga parakushtet për Serbinë që të integrohet në Bashkimin Evropian është edhe normalizimi i marrëdhënieve me Kosovën.

Kurse, presidenti Tadiq ka thënë se Serbia konsideron se çdo zgjidhje lidhur me konfliktet e veçanta në territorin e Evropës juglindore duhet të marrë parasysh stabilitetin e tërë rajonit, andaj i kundërshton precedentët. 

“Ne do të ballafaqohemi me çështje shumë të komplikuara, e një prej tyre është edhe Kosova. Serbia s’ka iluzione se mund ta fusë në konflikt BE-në, por Serbia dëshiron t’i zgjidhë konfliktet në territorin e Ballkanit Perëndimor”, ka deklaruar Tadiq.