Nëse hiqen taksat, joshen investitorët në Kosovë

Organizatat ekonomike në Kosovë shtrojnë nevojën urgjente të finalizimit të pakos së re fiskale.
Bëhet fjalë për pakon, ku është përfshirë futja në fuqi e pushimeve tatimore dhe zgjerimi i listës së lëndëve të para të liruara nga detyrimet doganore. Siç raportojnë mediat në Prishtinë, të dy këto pika, sipas drejtorit të Odës Ekonomike Amerikane në Kosovë, Arian Zeka, janë shumë të domosdoshme të hyjnë sa më shpejt në fuqi për shkak të krijimit të një ambienti më të favorshëm për investitorët, përcjell albinfo.ch.

Sa i përket pushimeve tatimore, Qeveria e Kosovës gati dy vjet më parë kishte marrë vendim që të ketë pushime nga taksat për të gjitha investimet e reja, tre deri në shtatë vjet. Por, që një vendim i tillë nuk kishte hyrë në fuqi asnjëherë, duke bërë që edhe investitorët e huaj të mos e shohin Kosovën si vend atraktiv për investime.

Rënia e investimeve të huaja dhe zbehja e interesimit të kompanive të huaja që kapitalin e tyre ta shtrijnë në Kosovë ishte mjaft e theksuar në vitin që lëmë pas.

Të dhënat e Bankës Qendrore të Republikës se Kosovës tregojnë se deri në muajin shtator të vitit 2016 shuma e investimeve të huaja ka qenë 184 milionë euro. Kurse në vitin 2015 investimet ndërkombëtare kanë qenë rreth 320 milionë euro.