Shpallet gjendje e jashtëzakonshme në Prishtinë

“Duke i pasur parasysh reshjet e vazhdueshme të borës, temperaturat shumë të ulëta dhe vështirësitë që këto kushte mund t’i sjellin në qarkullim, Komuna e Prishtinës ka shpallur gjendje të jashtëzakonshme për 48 orët e radhës”, thuhet në njoftimin e Komunës së Prishtinës

Komuna e Prishtinës ka shpallur gjendje të jashtëzakonshme për 48 orë, për shkak të kushteve në qarkullim, raporton albinfo.ch.

“Duke i pasur parasysh reshjet e vazhdueshme të borës, temperaturat shumë të ulëta dhe vështirësitë që këto kushte mund t’i sjellin në qarkullim, Komuna e Prishtinës ka shpallur gjendje të jashtëzakonshme për 48 orët e radhës”, thuhet në njoftimin e Komunës së Prishtinës.

Ajo iu ka bërë thirrje të gjitha kompanive që të jenë në aksion. “Të gjitha kompanitë e kontraktuara për pastrimin e rrugëve, me të gjitha kapacitetet që kanë duhet të jenë në terren. Përveç 8 kompanive aktuale, do të angazhohet edhe një kompani shtesë, në mënyrë që sa më shpejt të përmirësohet situata si në rrugët në qytet ashtu edhe në rrugët nëpër fshatra të Komunës së Prishtinës”.

Komuna gjithashtu iu ka bërë thirrje edhe qytetarëve që të jenë shumë të vëmendshëm. “Iu bëjmë thirrje edhe njëherë qytetarëve që të mos ngasin automjetet e tyre pa pajisjet dimërore, si dhe të mos parkojnë makinat në vendet ku pengojnë kompanitë e pastrimit të kryejnë punët e tyre. Masat e tilla të ndërmarra janë për të shmangur bllokimet dhe aksidentet eventuale, megjithëse deri më tani të gjitha rrugët kryesore janë të kalueshme”, përfundon komunikata e Komunës së Prishtinës.