Gruevski e Zaev përplasen për të drejtat e shqiptarëve

Gruevaski ka thënë se gjatë qeverisjes së tij, shqiptarët kanë gëzuar shumë më shumë të drejtat se sa në qeverisjen e LSDM-së

Vetëm pak ditë para se Nikolla Gruevski i VMRO-së të merr mandatin për formimin e qeverisë së re të Maqedonisë, ai ka sulmuar partinë rivale LSDM se nën qeverisjen e saj, shqiptarët janë diskriminuar dhe shtypur etnikisht. Gruevaski ka thënë se gjatë qeverisjes së tij, shqiptarët kanë gëzuar shumë më shumë të drejtat se sa më parë.

Lideri i VMRO DPMNE-së Nikolla Gruevski në intervistë për portalin “republika.mk” tha se partia e tij nuk është parti shoviniste, ndërsa personalisht tha se nuk është nacionalist dhe nuk punon kundër shqiptarëve. Ai akuzoi LSDM-në se ka burgosur dhe diskriminuar shqiptarët ndërsa tha se ai po bën të kundërtën

Ndërkaq, LSDM e Zoran Zaevit thotë se është VMRO DPMNE-ja ajo e cila ka bërë ndarjen ndëretnike në Maqedoni.

Kjo sipas LSDM-së ishte njëra ndër arsyet që qytetarët në zgjedhjet e 11 dhjetorit qytetarët votuan për ndryshim.

BDI nuk ka dëshiruar të komentojnë intervistën e Gruevskit, por shkurt thanë se kohërat kanë ndryshuar dhe se shqiptarët në Maqedoni i dalin zot vet kauzës së tyre.

Nga Lëvizja Besa thanë se krime kundër shqiptarëve ka pasur edhe në kohën e LSDM-së dhe atë të VMRO DPMNE-së, citon AlsatM.

“Është e vërtetë se edhe në të kaluarën LSDM-ja ka qenë shumë antishqiptare dhe ne nuk e kemi harruar këtë. Por nuk i kemi harruar as viktimat shqiptare të kohës së Gruevskit. Shqiptarët e rastit së “Sopotit” dhe “Monstra” ende vuajnë si pasojë e qëndrimit antishqiptarë dhe Gruevskit dhe VMRO-së”, thuhet në reagimin e Lëvizjes Besa.

“Ne edhe më tej mbetemi në qëndrimin tonë se deklarata të tilla nga ana e Gruevskit dhe VMRO-së nuk na bëjnë aspak përshtypje dhe nuk na bëjnë ta ndërrojmë qëndrimin tonë ndaj lidershipit antishqiptar të VMRO-së dhe Nikolla Gruevskit”, u shpreh Orhan Murtezani, zëdhënës i Lëvizjes Besa.

Për “Aleancën për Shqiptarët” fjalori i Nikolla Gruevskit është ngacmues dhe ofendues për shqiptarët dhe kujtuan rastet e hapura kundër shqiptarëve në kohën kur VMRO – DPMNE-ja ishte në qeveri.

“Aksionet policore, tërheqja zvarrë e shqiptarëve, fjalori i tyre barbar ndaj shqiptarëve, proceset e montuara politike, “Monstra”, gërmadhat e Lagjes së Trimave në Kumanovë, ngufatja e perspektivës Euroatlantike, janë shembulli më i keq i këtij ish kryeministri që duke dashur të bëhet ikonë e maqedonasve u shndërrua në lugat politik ndaj shqiptarëve”, njoftojnë nga Aleanca për Shqiptarët.