Gripi sezonal me përmasa shqetësuese: mbyllen shkollat

Sipas qeverisë në Tiranë, vendimi për mbylljen e çerdheve dhe shkollave deri më 7 janar, erdhi pas përhapjes së menjëhershme të virusit të gripit në popullatë. Deri më tani 15 mijë veta kërkuan ndihmën e mjekut

Ministria shqiptare e Shëndetësisë ka marrë vendim që t’i mbyllë çerdhet, kopshtet dhe shkollat nga data 4 deri më 7 janar për shkak të gripit sezonal që ka marrë përmasa shqetësuese në këtë shtet. Sipas qeverisë në Tiranë, vendimi për mbylljen e institucioneve arsimore edukative erdhi pas përhapjes së menjëhershme të virusit të gripit në popullatë.

Po ashtu Qeveria ka marrë vendimin për të lënë pushim 4-5-6 janar njërin prej prindërve që punojnë në administratë, e që kanë fëmijë të mitur.

“Qeveria, në vijim të masave parandaluese të Ministrisë së Shëndetësisë, vendosi edhe caktimin e këtyre datave, 4, 5 dhe 6 janar 2017, ditë pushimi për një nga prindërit që kanë fëmijë të mitur që frekuentojnë/ndjekin ose jo çerdhet, arsimin parashkollor dhe arsimin fillor, që janë nëpunës civilë dhe punonjës të tjerë të administratës publike, të nivelit qendror dhe vendor, si dhe në institucionet e tjera shtetërore”, thuhet në vendim.

Gjithashtu Qeveria i bëhet thirrje sektorit privat që t’u vijnë në ndihmë prindërve me fëmijë të mitur që të marrin të njëjtin vendim.

“Qeveria iu bën thirrje edhe të gjithë punëdhënësve privatë që të gjejnë mundësitë për trajtimin me pushim të një nga prindërve që kanë fëmijë të mitur që frekuentojnë/ndjekin ose jo çerdhet, arsimin parashkollor dhe arsimin fillor”, thuhet më tej në vendimin e Qeverisë së Shqipërisë.

Ndryshe, Shqipëria është përfshirë nga epidemia e gripit, e cila ka prekur mbi 15 mijë qytetarë, të regjistruar në institucione shëndetësore. Siç thotë TCH, numri mund të jetë edhe më i madh, pasi shumë qytetarë nuk paraqiten për të kërkuar ndihmën e mjekut.

“Përhapja ishte e menjëhershme. Ka filluar që në dhjetor dhe është përhapur me shpejtësi. Simptomat janë temperaturë e lartë, dhimbje muskujsh, këputje…”, thotë shefja e Departamentit të Sëmundjeve Infektive në Institutin e Shëndetit Publik, Silva Bino.