Liberalizimi mund të shfrytëzohet për të braktisur Kosovën

Liberalizimi i vizave, thonë të rinjtë e Kosovës, është mundësi e mirë për ta lëshuar Kosovën në kërkim të një jete ndryshe

Pak qytetarë të Kosovës do ta shfrytëzonin liberalizimin e vizave për qëllime turistike apo të tjera, por shumica prej tyre do të kërkonin një jetë më ndryshe sesa ajo në Kosovë, shkruan “Evropa e Lirë”.

Të rinj dhe të paperspektivë, konsiderojnë se e ardhmja e tyre nuk mund të shihet në vendin e lindjes. Liberalizimi i vizave, thonë të rinjtë e Kosovës, është mundësi e mirë për ta lëshuar Kosovën në kërkim të një jete ndryshe, përcjell albinfo.ch.

Dhjetëra mijëra qytetarë u larguan nga Kosova në fillim vitin e kaluar, duke shfrytëzuar kalimet ilegale përmes Serbisë drejt vendeve të BE-së. Shumica syresh thanë se paperspektiva në vend dhe pamundësia për të gjetur punë i bën që të emigrojnë.

Kosova llogaritet të jetë një ndër vendet më të izoluara në Evropë dhe për t’u mundësuar qytetarëve të saj lirinë e lëvizjes në vendet e BE-së, ajo duhet të përmbushë edhe dy kriteret e mbetura; ta ratifikojë Marrëveshjen për demarkacionin e kufirit me Malin e Zi dhe të fuqizojë përmes rezultateve konkrete luftën kundër korrupsionit.

Heqja e vizave nga Bashkimi Evropian, thonë ekspertët, mund të keqpërdoret nga qytetarë të Kosovës për të qëndruar në vendet e BE-së. Ata përmendin eksperiencat e shteteve tjera që kishin në fillim të zbatimit të këtij procesi, të cilat kanë dëshmuar se ka pasur fluks të emigrimit.

Liberalizimi i vizave, në asnjë rast, nuk mundëson punësim apo ndonjë veprimtari ekonomike në shtetet e zonës Schengen. Udhëtimin pa viza mund ta bëjë çdo qytetar, shtetas i Republikës së Kosovës, që posedon pasaportë biometrike.

I gjithë dëshpërimi dhe zhgënjimi i qytetarëve të Kosovës vie si pasojë e pritjeve të mëdha të tyre për përmirësim të kushteve ekonomike, që pas shpalljes së pavarësisë, thonë sociologët.