Numër rekord i udhëtarëve në aeroportet e Maqedonisë

Prirja e rritjes së numrit të udhëtarëve vazhdon, duke arritur në mbi 1,6 milionë pasagjerë nga janari deri në nëntor, një rritje prej 15.7% krahasuar me të njëjtën periudhë të vitit të kaluar.

Koncesioneri TAV thotë se shifrat e mira janë për shkak të përpjekjeve të kombinuara të politikave të kompanisë për të rritur praninë e linjave ajrore me kosto të ulët dhe fluturimet për dhe nga Maqedonia.

Trafiku në dy aeroportet e Maqedonisë është në rritje 7 vjet rresht. Numri i pasagjerëve u rrit sidomos në dy linjat e fundit të reja në dy aeroportet. Në Shkup aktualisht veprojnë 30 destinacione dhe në Ohër 3 gjatë gjithë vitit: Cyrih, Londër dhe Bazel, si dhe shumë fluturime çarter si nga Beogradi, Amsterdami, Brukseli e Tel Avivi.

Pritjet e kompanisë janë që trafiku ajror të vazhdojë këtë vrull të zhvillimit edhe në vitin e ardhshëm dhe të shtohen linja të reja.

Nga Shkupi destinacionet më të frekuentuara mbeten Stambolli, Cyrihu, Vjena, Bazeli, Malmo dhe Londra.