Rama kritikon BE-në për izolimin e Kosovës

“Turp për BE-në që kosovarët nuk lëvizin lirshëm në Evropë. Kosova është kyç për sigurinë e BE-së dhe të Evropës si e tërë”, deklaroi Edi Rama

Kryeministri i Shqipërisë, Edi Rama theksoi se është turp për Bashkimin Evropian që shtetasit kosovarë nuk mund të lëvizin lirshëm në Evropë, raporton albinfo.ch.

Këtë deklaratë, kreu i qeverisë shqiptare e bëri gjatë takimit të fundvitit me diplomatët.

“Turp për BE-në që kosovarët nuk lëvizin lirshëm në Evropë. Janë ndaluar që të jenë njësoj në të drejtën për të lëvizur lirisht. Ky ndalim është shprehje e dobësisë që sot manifestohet nga BE-ja, ndërkohë që Kosova, si shteti më i ri i Evropës, ka nevojë të trajtohet njerëzisht. Kosova është kyç për sigurinë e BE-së dhe të Evropës si e tërë”, deklaroi Rama.

Më tej, kryeministri shqiptar foli edhe për marrëdhëniet me fqinjët: “Kemi dëshirë që bashkë me fqinjët të ndërtojmë, pasi ajo që na bashkon është shumë më e madhe se ajo që na ndan. Do të vijojmë punën që marrëdhëniet tona me fqinjët të karakterizohen nga dialogu i hapur. Është me rëndësi që atmosfera e paqes dhe ndërveprimit të intensifikohet”, theksoi kryeministri shqiptar.

Rama dha edhe një mesazh për partitë politike shqiptare në Maqedoni, ku u shpreh se partitë shqiptare në Maqedoni kanë dinjitetin e tyre dhe nuk janë të detyruara të bien dakord për gjithçka, por janë të imponuara për interesin e shqiptarëve që të jenë dakord për bashkëjetesën e dy popujve me të drejta të plota në një shtet.