Maqedoni, lufta e maqedonasve për mbështetjen e shqiptarëve

Lufte e ashpër mes dy partive maqedonase, VMRO dhe LSDM për të fituar mbështetjen e shqiptareve. Të dy partitë premtojnë trajtim të barabartë si për shqiptarët ashtu edhe për maqedonasit

Dy partitë maqedonase që luftojnë për kreun e qeverisë, VMRO DPMNE e ish kryeministrit Nikolla Gruevski dhe LSDM e liderit opozitar, Zoran Zaev, po luftojnë ashpër për të marrë mbështetjen e shqiptarëve, që përbëjnë një të tretën e trungut në Maqedoni. Të dy liderët po premtojnë trajtim të barabartë për të dy komunitetet.

Ish-kryeministri deklaroi se ne qeverinë e tij shqiptaret janë trajtuar si të barabartë dhe nuk ka patur diferencime.

“Te gjithë janë bijtë dhe bijat e Maqedonisë. Ne nuk duhet t’i ndajmë dhe të krijojmë urrejtje. Nuk duhet të krijojmë gjakmarrje mes nesh, pasi ndajmë të njëjtin fat dhe të njëjta probleme. Për gati dy vjet opozita dhe Zaev kanë tentuar ta mbajnë peng vendin, por tani ka ardhur koha të ecim përpara”, tha Gruevski.

I menjëhershëm ishte reagimi i kreut të opozitës, i cili deklaroi se Gruevski ka vite që qeverisë duke gënjyer, jo vetëm maqedonasit, por edhe shqiptarët.

“Nëse Maqedonia është në këtë gjendje, me procesin e integrimit të bllokuar dhe ne këtë krize të thelle ekonomike, e gjitha është për fajin e qeverisjes së Gruevskit. Ai gjithçka e ka ndërtuar mbi gënjeshtrën. Ka një dekadë që gënjen maqedonasit, por edhe shqiptarët. Në qeverinë tonë, të gjithë do të trajtohen si të barabartë”, tha Zaev, citon Vizion Plus.

Ky i fundit, edhe para se të filloj fushata zgjedhore për zgjedhjet e 11 dhjetorit, ka premtuar zyrtarizmin e gjuhës shqipe në gjithë Maqedoninë. Madje në partinë e tij janë edhe disa intelektualë shqiptarë.

Në anën tjetër, qeveria e ish kryeministrit Gruevski i ka injoruar dhe diskriminuar  shqiptarët. Madje në përgjimet telefonike që janë publikuar nga opozita, njerëzit më të afërt të Gruevskit, shqiptarët i kanë quajtur “indianci”.

Kur mbetën edhe me pak se 2 javë nga zgjedhjet e 11 dhjetorit, VMRO-DPMNE udhëheq në sondazhet paraprake, ndërsa në radhët e partive shqiptare në avantazh është BDI.