Trump, Qytetar Nderi i Kamzës!

Vendimi është marrë nga Këshilli i Bashkisë së Kamzës me motivacionin “Si një model revolucionar i rendit të ri demokratik, një ekspert ekonomik, një negociator në politikat e jashtme, një komunikues mendjemprehtë popullor dhe një udhëheqës i kohëve moderne”

Duket e pabesueshme, por është e vërtetë. Donald Trump është emëruar Qytetar Nderi në Kamëz. Ky lajm ka marrë jehonë ndërkombëtare dhe janë të shumta mediat që kanë shkruar për këtë rast. Trump ende nuk është zgjedhur zyrtarisht president i SHBA-së, derisa çmimi i parë erdhi nga Shqipëria, shkruan albinfo.ch.

Vendim ishte marrë nga Këshilli i Bashkisë së Kamzës me motivacionin “Si një model revolucionar i rendit të ri demokratik, një ekspert ekonomik, një negociator në politikat e jashtme, një komunikues mendjemprehtë popullor dhe një udhëheqës i kohëve moderne”.

Në faqen e tij në rrjetet sociale, kreu i Bashkisë së Kamzës, Xhelal Mziu, pasi komunikon vendimin bën edhe një pasqyrë të jetës së Donald Trump.

“Në vitin 2016 ai u nominua për President të të gjithë amerikanëve duke thyer çdo rekord votuesish si një model revolucionar i rendit të ri demokratik në mbarë botën”, thuhet aty.

Sigurisht se vendimi i tij është pritur me shumë komente, si në Shqipëri, por edhe në vendet tjera ku është dhënë lajmi.

Kreu i Bashkisë së Kamzës është i njohur për vendime të çuditshme, derisa ky vend me 100 mijë banorë tashmë është bërë shumë i njohur.