Thaçit i vazhdohet paraburgimi

Gjykata Speciale e Serbisë në Beograd i ka zgjatur paraburgimin edhe prej 30 ditësh, Nehat Thaçit, drejtor i Policisë për Rajonin e Mitrovicës

Në ditën kur pritej lirimi nga paraburgimi, Gjykata Speciale e Serbisë në Beograd i ka zgjatur paraburgimin edhe prej 30 ditësh, Nehat Thaçit, drejtor i Policisë për Rajonin e Mitrovicës. Thaçi, ish gueril i UÇK-së është arrestuar në pikën kufitare Dheu i Bardh ndërmjet Kosovës dhe Serbisë.

Ai është duke u hetuar nga Prokuroria për Krimin e Organizuar nën dyshimin se ka kryer veprën penale të terrorizmit në Kosovë në vitin 1999, transmeton Tanjug, përcjell TG.

Avokatët mbrojtës të Thaçit tri ditë më parë kanë kërkuar ndërprerjen e paraburgimit , pasi që pala e “dëmtuar” ka dëshmuar në favor të Thaçit.

Kundër vazhdimit të paraburgimit ka reaguar ministri i Punëve të Jashtme i Kosovës, Enver Hoxhaj. Në reagimin e publikuar në llogarinë e tij në Twitter, Hoxhaj thotë se ky veprim është i papranueshëm dhe e dëmton procesin e normalizimit të marrëdhënieve në mes të Kosovës dhe Serbisë.