Serbët arrestojnë drejtorin kosovar të policisë: akuzohet për terrorizëm

"Gjykata e Lartë në Nish më 17 shtator të vitit 2010, ka lëshuar vendim për paraburgimin e të dyshuarit mbi dyshimin se ka kryer vepër penale të terrorizmit dhe ka lëshuar urdhër-arrest”

Policia serbe e ka arrestuar mbrëmë drejtorin e Policisë së Kosovës, Nehat Thaqin. Arrestimi ka ndodhur në vendkalimin kufitar të Kosovës me Serbinë, në Konçul, në territorin e Serbisë. Arrestimi është bërë duke u bazuar në një urdhërarrest të Gjykatës së Nishit, e cila e fajëson Thaqin për terrorizëm.

Gazeta Express citon zëdhënësen e Gjykatës së Lartë në Nish të ketë thënë se procedurat kundër tij dhe dyshimet se ka marrë pjesë në veprime terroriste kanë nisur në vitin 2010.

“Gjykata e Lartë në Nish më 17 shtator të vitit 2010, ka lëshuar vendim për paraburgimin e të dyshuarit mbi dyshimin se ka kryer vepër penale të terrorizmit dhe ka lëshuar urdhër-arrest”, ka thënë zëdhënësja e Gjykatës së Lartë në Nish, Iva Popoviç për Gazetën Express.

Thaqi u arrestua mbrëmë rreth orës 20, në momentin kur ai dorëzoi dokumentin e tij për të hyrë në territorin serb, afër Bujanocit.

Policia e Kosovës ka konfirmuar arrestimin e zyrtarit policor në Serbi.

Nehat Thaqi pritet që sot të dalë para gjykatës në Nish, bëjnë me dije burime të Gazetës Express brenda Policisë së Kosovës