Policia nxjerr nga trafiku autobusin shqiptar të bërë “për skrap”

Autobusi u kishte rënë në sy policëve në autostradë afër Këlnit pasi që shihej se ishte i ndryshkur së tepërmi dhe kishte humbur tej mase vaj

Policët kanë nxjerrë të hënën në autostradë, te Këlni nga komunikacioni një autobus udhëtarësh të bërë për hedhurina, shkruan bild.de. Qendra e frerëve të autobusit ishte përforcuar me një çelës automekanikësh ndërsa lista e të gjitha mangësive që kishte ky autobus mbushte plot tri faqe të shkruara!

Autobusi u kishte rënë në sy policëve të hënën pasi që shihej se ishte i ndryshkur së tepërmi dhe kishte humbur tej mase vaj, transmeton albinfo.ch. Pas shikimit më të detajuar u konstatua se veç tjerash edhe pjesët llozi mbështetës ishte i ndryshkur.

Ekspertiza pastaj e ka klasifikuar autobusin e vjetër 18 vjet si tërësisht të pasigurt për trafik. Shoferi 45 vjeçar është detyruar të deponojë një shumë sigurie prej 1350 eurosh ndërsa ndaj tij dhe operatorit të udhëtimeve janë ushtruar kallëzime penale.

Grupi prej 50 vetash që po udhëtonte me këtë autobus drejt Holandës e ka vazhduar udhëtimin me një autobus tjetër.