Mes pritjesh të mëdha dhe kërcënimesh, fillon sot Forumi i Davosit 2011

Do të mbahen 250 podiume, të fokusuara kryesisht në temat rreth bartjes së fuqisë ekonomike botërore drejt lindjes dhe jugut 　

Sot fillon në Davos Forumi Ekonomik Ndërkombëtar, i 41-të me radhë. Në këtë organizim të përmasave të mëdha që do të zgjasë prej sot deri të dielën, pritet të marrin pjesë 2500 njerëz me peshë nga bota e politikës, ekonomisë, shoqërisë e kulturës, nga rreth 100 vende.

Në suazat e forumit do të mbahen 250 podiume të ndryshme, të cilat janë të fokusuara kryesisht në temat rreth bartjes së fuqisë ekonomike botërore drejt lindjes dhe jugut. Kjo dhe është arsyeja për një interes të madh për praninë e delegacioneve të mëdha kineze, indiane dhe ruse në këtë forum, njofton St. Galler Tagblatt.　

Forumin pritet ta hapë presidenti i Rusisë, Medwedew, i cili me gjithë paralajmërimet për anulim të udhëtimit, ka ardhur në Zvicër. Ai do të qëndrojë këtu vetëm një ditë, për shkak të gjendjes në vendin e tij, ku ditë më parë pati një sulm terrorist me mbi 30 të vdekur.

Pos Medwedew-it, podiume të veçanta u janë rezervuar edhe ministrit amerikan të financave, Geithner, presidentit francez Nicolas Sarkozy, kancelares gjermane Angela Merkel, kryeministrit britanik David cameron dhe atij japonez Naoto Kan.

Edhe Zvicra do të përfaqësohet në nivelin e saj më të lartë në këtë forum. Katër nga gjithsej shtatë ministrat e saj do të jenë aty, të kryesuar nga presidentja, njëherësh ministre e jashtme, Micehline Calmy Rey. Ajo, së bashku me themeluesin e forumit, Klaus Schwab do të përshëndesë të pranishmit dhe do të hapë solemnisht sonte në mbrëmje punimet e WEF davos 2011.