Mjekësia komplementare, sërish pjesë e sigurimit bazë

Duke filluar nga viti 2012, trajtimi përmes mjekësisë komplementare do të futet në katalogun e sigurimit të detyruar shëndetësor

Ish ministri i shëndetësisë Pascal Couchepin, pesë vite më parë e kishte përjashtuar mjekësinë alternative (komplementare) nga lista e shërbimeve që i mbulon sigurimi bazë shëndetësor. Ndërkaq, trashëgimtari i postit të tij, Didier Burkhalter ka marrë një vendim ndryshe.

Duke filluar nga viti 2012, trajtimi me metoda të mjekësisë komplementare sërish do të futet në katalogun e sigurimit të detyruar shëndetësor, shkruan Tages Anzeiger. Këtu hyjnë pesë metoda alternative të mjekësisë si: homeopatia, mjekësia atroposofike, terapia neurale, phyto-terapia dhe mjekësia tradicionale kineze.

Fillimisht, ky vendim do të ketë fazën e tij “testuese” që do të zgjasë deri në viti 2017 dhe pastaj, në varësi nga vlerësimi i efektit të tij, do të vazhdohet ose ndërpritet.

Vendimi është kritikuar si “vendim politik” nga përfaqësuesit e arkave të shëndetësisë ndërsa është përshëndetur nga mjekët që praktikojnë mjekësinë komplementare si dhe nga një pjesë e mirë e popullit që shfrytëzon metodat e kësaj medicine.